Nhlakanipho Mnqayi
Ubumnandi bebubuzwa eThe Station, eStamford Hill, eThekwini izolo njengoba bekunomcimbi weKabza and Friends obuxhaswe inkampani kagologo iHennessy.
Izinkumbi zabantu ebezithamele lomcimbi bezingawuvali umlomo njengoba amaciko abesina ededelana kwazise lomcimbi ubundlalela eminye yemicimbi ethe chithi saka eThekwini njengoba kuyimpelasonto yomjaho waminyaka yonke wamahhashi iHollywoodbets Durban July obanjelwe eGreyville Racecourse.
Inkundla ivulwe nguZawadi Yamungu ondlalele usingaye, uKabza De Small kwathi emva kwalokho kwalandela yena uKabza oklwebhe amapleti amahora amabili ededela amanoni ehlukene.
Kuthe abantu besathamele lokho, kwangena uDlala Thukzin naye owenze adume ngakho washiya inkundla ishisa.
UMdu TRP, uqhubeke lapho uThukzin egcine khona, abantu bakuthakasela lokho.
Amanye amaciko asine adedelana kubalwa oDj Tira, noLeehleza namanye kanti inhlosongqangi yalomcimbi bekuwutshengisa ikhono lamaciko aseNingizimu Afrika kanye namasiko ngokusebenzisana kanye nokutshengisa amaciko asakhula.
