Kumenyezelwe abaculi nabafundisi abazoshiyelana inkundla kwi-Off Ramp Worship Experience, ePort Shepstone ngasekupheleni kukaJune.
Umcimbi uyingxenye ye-Off Ramp Experience esizohambisana noGu Jazz Festival ebuyayo.
I-Off Ramp Worship Experience izoba se-Ugu Sports & Leisure Centre ngoJune 27.
Kuzobe kukhona uXolly Mncwango, Hlengiwe Mhlaba, Sgwili, Malusi Mbokazi, Pastor Shongwe, Prophet Msimang noSthabile Manyambose nabanye abangakamenyezelwa.
Umhleli womcimbi uSiyabonga Msomi wenkampani iCoolsound Trading uthe iWorship Experience yindawo ekhethekile yokuthi amakholwa axhumane noNkulunkulu ngomculo nendumiso.
“Sizobe sikhulekela nezinto ezimbi ezikhungethe umhlaba simeme uNkulunkulu ukuthi asilungisele umhlaba ube yindawo engcono yokuphila kuwo,” kuchaza uMsomi.
Uthe kungenwa ngomnikelo kaR100 oyithikithi elidayisa eTicketpro. Kuzoqalwa ngo-6 ntambama kuze kube u-2 entathakusa.
IWorship Experience uthe iyisendlalelo soGu Jazz Festival ezokwethulwa kabusha e-Ugu Sports & Leisure Centre ngoJune 28.
Uthe bazoba nabaculi abambalwa nesibalo esikalekile sabantu ngoba basayithula kabusha.
Amathikithi aseyadayisa eTickepro ngoR150 kuya phezulu.
Eminye imicimbi ye-Off Ramp Experience umncintiswano wokudoba eMargate ngo-21 June, umdlalo webhola ngosuku olufanayo ne-hiking.
