Nhlakanipho Mnqayi
Njengoba kubhekwe okhethweni lohulumeni basekhaya oluzoba zingu-4 November nonyaka, izigameko zokubulawa kwamakhansela nalabo abagaqele izikhundla zobukhansela seziphenduke insakavukela umchilo wesidwaba esifundazweni saKwaZulu-Natal.
Muva nje, zingu-6 August nonyaka, kudutshulwe kwabulawa ikhansela le-ANC laku-ward-17 eKlaarwater, uMnuz Sbusiso “Khekhe” Khwela, owadutshulwa esehhovisi lakhe.
Izolo, kudutshulwe kwabulawa amalunga amabili e-ANC, kwalimala amanye amabili ngesikhathi ekhankasa eMgababa eningizimu yeTheku.
Omunye wabadutshuliwe ubengumxhumanisi wegatsha, omunye uyisishoshovu sakhona egatsheni laseMgababa.
Ngokusho kwemibiko ithi laba bebekhankasa endaweni ngesikhathi kuqhamuka imoto ivulela ngezulu lezandla ibhekise kubo.
Bekungesikho okokuqala isigameko esifana nalesi senzeka kuyo le ndawo njengoba ngoFebruary nonyaka ku-ward-67 kwadutshulwa kwabulawa ikhansela le-ANC, uMnuz Sipho Dlamini owadutshulwa eyongena ekhaya lakhe.
Amaphoyisa KwaZulu-Natal, asevule amacala amabili okubulala kanye namathathu okuzama ukubulala.
“Imibiko ithi abesifazane ababili kanye nowesilisa oyedwa belinye lamaqembu ezepolitiki nonogada babo ababili bebekhankasa ngesikhathi iveni yohlobo lwe-Isuzu iqhamuka emuva kwabo. Abebesevenini bavulele ngezulu lezandla bebhekise kubo. Owesilisa nowesifazane bashonele endaweni yesigameko kwathi owesifazane oyedwa wadubuleka emlenzeni ngesikhathi ebaleka. Onogada ababili babalekile endaweni yesigameko futhi abakatholakali,” kusho isitatimende.
Ayaziwa mbangela yokubulawa kwabo kodwa kuyasolakala ukuthi isigameko sihlobene nezepolitiki.
