Nhlakanipho Mnqayi
ULundi United FC edlala kuKZN ABC Motsepe League luguqise AmaZulu FC ngo 2-0 emdlalweni owandulela owamanqamu ePrince Mangosuthu Legacy Cup, obanjelwe ePrince Mangosuthu Regional Stadium, OLundi.
ULundi United yilo olugadle kuqala zibekwa nje ngegoli elishaywe ngPhilasande Mbatha ngomzuzu ka-9, umdlalo uqalile. AmaZulu azamile ukubuyisa izinduku kodwa kwala njengoba umdlalo uze waya ekhefini kuyilo ULundi oluhamba phambili.
Ngesiwombe sesibili, AmaZulu acindezelile ezama ukubuyisa izinduku, kodwa izitobha zoLundi bezingafuni lutho.
Ngokuqhubeka komdlalo, ULundi lithole ithuba phambi kwamapali oSuthu nokuyilapho beshaye igoli layo lesibili nokuyilo elivale umcimbi.
Umqeqeshi woLundi United, u-Ayanda Dlamini, uthe iqembu lakhe liwuqale kahle umdlalo.
“Emizuzwini engu-15 yokuqala sibafakele ingcindezi okuyiyo esinike igoli lethu lokuqala kodwa saphinde sabadedela,” kusho uDlamini.
ULundi United selulinde ozonqoba phakathi kweNsingizini Hotspurs neMbabane Highlanders AM.
Umdlalo wamanqamu uzodlalwa ngo-4 ntambama.
