Nhlakanipho Mnqayi
Ukungabi sesimeni esihle kwenkundla iHarry Gwala Stadium eMgungundlovu kuphoqe ukuthi uMkhambathi FC uyise umdlalo wawo kwenye inkundla.
Leli qembu bekumele lidlale umdlalo walo weNedbank Cup neLeruma Lions FC, eHarry Gwala Stadium ngesonto zingu-8 February nonyaka, kodwa ngenxa yokungabi sesimeni esihle, lomdlalo usuzodlalelwa eThekwini, eSugar Ray Xulu Stadium, eClermont ngo-3 emini.
UNkosingiphile “Dimco” Ntinga ongomunye wethimba labaqeqeshi boMkhambathi, utshele Ezangempela For Real ukuthi ukushintsha kwenkundla angeke kubalimaze kangako.
“Angeke kube nomthelela omubu kangako ngoba iSugar Ray Xulu kulesizini iyikhaya lethu lesibili njengoba sesike sadlala kabili kuyona,” kusho uNtinga.
Uthe noma inkundla yaseClermont ifana nekhaya labo lesibili, kodwa kuzozwela kubalandeli babo.
“Ukushintsha inkundla komdlalo wethu kuzophazamisa kakhulu kubalandeli beqembu ezinhlelweni zabo ngoba iSugar Ray iqhelile kubona,” ubeke kanje.
Uphende waveza ukuthi lomdlalo weNedbank Cup uzobalekelela emgqigqweni wabo weKZN ABC Motsepe League njengoba belele endaweni yokuqala ku-stream B ngamaphuzu angu-29 emva kwemidlalo engu-12.
“Lomqhudelwano uzosilekelela kakhulu emkhankasweni wethu wokufuna ukuyomela isiFunda kumaNational Playoffs okuyinto nabafana abayibheke ngabomvu.”
