Nhlakanipho Mnqayi
UMphathiswa wezokuBusa ngokuBambisana nezoMdabu KwaZulu-Natal, uMfundisi Thulasizwe Buthelezi usamukele isibonelelelo sezinhlekelele esingu-R227 700 000 esinikelelwe omasipala KwaZulu-Natal.
Lesi sibonelelo simenyezelwe namuhla uNgqongqoshe wezokuBusa ngokubaMbisana nezoMdabu (Cogta), uMnuz Velenkosini Hlabisa ngenhloso yokusiza omasipala KwaZulu-Natal ngenxa yesimo sezulu esenze umonakalo omkhulu saphinde sadlula nemiphefumulo yabantu esifundazweni. Babalelelwa ku-30 abashonile kwathinteka nabantu abangu-10 000 kusukela ngoDisemba 2024 noMashi 2025 nonyaka.
“Iningi lalezi zibonelelo zikhishwe umnyango kazwelonke wakwa-Cogta ngaphansi komnyango wezinhlekelele iNational Disaster Management Centre (NDMC) ngoFebhuwari nangoMashi nonyaka. Lesi sibonelelo zizohamba ibanga elide ekusizeni imiphakathi nokulungisa ingqalasizinda,” kusho uMfu Buthelezi.
Uthe lesi sibonelelo sifike ngesikhathi esikahle njengoba omasipala neminyango bezokwazi ukuqala imisebenzi ezosiza imiphakathi ekhahlamezekile.
“Leyo misebenzi ifaka phakathi ukulungiswa kwemigwaqo, ukulungiswa kukagesi namanzi, ingqalasizinda nokuthuthukisa izitamkoko. Lesi sibonelelo sizophinde sisizi ezingqinambeni imiphakathi yethu ehlangabezana nazo,” usho kanje.
Uphinde wagcizelela ukuthi omasipala baqikelele ukuthi lezi zibonelelo bazisebenzisa ngendlela okuyiyo ukuze labo abakhahlamezekilw basizakale. Uthe uzophinde azibophezele ukuthi umnyango uyabukisisa ukuthi imali isetshenziselwa into ekhona.
Nantu uhlu lwezibonelelo olunikezwe omasipala ngokuhlukana kwabo.
• Edumbe Local Municipality: R 6,800,000.00
• Abaqulusi Local Municipality: R 5,400,000.00
• Mfolozi Local Municipality: R 5,300,000.00
• uLundi Local Municipality: R 5,500,000.00
• Zululand District Municipality: R 9,000,000.00
• Uthukela District Municipality: R 6,900,000.00
• UMhlabuyalingana Local Municipality: R 5,200,000.00
• Mthonjaneni Local Municipality: R 4,200,000.00
• Nquthu Local Municipality: R 5,100,000.00
• Nkandla Local Municipality: R 5,000,000.00
• Mvoti Local Municipality: R 6,400,000.00
• Mzinyathi District Municipality: R 6,500,000.00
• Mandeni Local Municipality: R 5,100,000.00
• UMlalazi Local Municipality- R14,200,000.00.
• Alfred Duma Local Municipality- R50,000,000.00.
• Dannhauser Local Municipality- R11,200,000.00.
• Mntubatuba Local Municipality – R19,700,000.00.
• Maphumulo Local Municipality- R13,300,000.00.
• Ndwedwe Local Municipality – R25,000,000.00.
• Mpofana Local Municipality – R17,900,000.00.
