Nhlakanipho Mnqayi
Njengoba usuku lwezingu-30 June nonyaka lusemome, nalapho okulindeleke ukuthi kube nemashi elwisana nabokufika abakuleli ngokungemthetho, amaphoyisa axoxisane nabahleli beMarch and March mayelana nemizila abangayisebenzisa.
Amaphoyisa ahlangana nalaba bahleli-nje, uMasipala weTheku usanda kunqabela Inhlangano lenhlangano ukuthi iqhubeke nale mashi ngenxa yokuthi ezokuphepha zizobe zisengcupheni.
Ibamba likaKhomishana wesiFundazwe KwaZulu-Natal, uMajor General Phumelele Makoba, ibamba lephini likaKhomishana wesifundazwe, uMajor General Vukani Mgobhozi, kanye nebamba likaKhomishana wesiFundazwe obhekelele ezobugebengu, uMajor General Anthony Gopaul, bahlangane nabahleli beMarch and March, ebiholwa uNkk Jacinta Ngobese-Zuma izolo ukuze kuphunywe nesisombululo.
Ngokusho kwesitatimende samaphoyisa sithe, uMajor General Makoba kanye nethimba lakhe bangenelelile ukuze kube nokuthula phakathi kweDolobha, ezomthetho, kanye nabeMarch and March.
“Sikholwa ukuthi bekukhona ukungabonisani obekudinga ukuthi kucaciswe. Njengamaphoyisa, sizoxoxisana namaphoyisa kaMasipala weTheku (Metro Police), futh8 ukuzibophezela kwethu ukuthi ingalo yomthetho kanye neMarch March baphume nesivumelwano, okanye nesinqumo semizila engasetshenziswa, futhi amaphoyisa azobe ekhona ukuqinisekisa ezokuphepha nokuqapha. Sizonivikela njengoba nizobe nimasha futhi siqinise ingalo yomthetho kulabo abazobe benza okuphambene,” kusho uMajor General Makoba.
Okunye okuhlalukile kulesi sithangami ukuthi amaphoyisa KwaZulu-Natal ayilungele imashi ezoba seThekwini kanye nazo zonke izinto ezizokwenzeka ezindaweni ezahlukene, ikakhulukazi lezi ezihlonzwe njengokuthi zingase zibe yingozi.
Khonamanjalo amaphoyisa axwayise labo abazobe bemasha ukuthi lokho bekwenze ngokuthyla futhi belandele umthetho. Amaphoyisa azobe ekhona ukuqinisekisa ukuthi ayawenza umsebenzi wawo wokuvikela abahlali baKwaZulu-Natal kanye nempahla yabo.
