Nhlakanipho Mnqayi
Inhlangano engenzi nzuzo, i-12th Man Group izosingatha umqhudelwano wokuqala ngqa, i-The Fans Cup lapho abalandeli bamaqembu bezogadulisana eKing Zwelithini stadium, eMlazi kusasa, zingu-21 June nonyaka.
Kubalandeli abazotholana phezulu kubalwa abalandeli beMamelodi Sundowns, Kaizer Chiefs, Orlando Pirates neRoyal AM. Abanye babantu abazohambela lomqhudelwano kubalwa uMphathiswa wezokuThutha nokuHlaliswa kwaBantu, uMnuz Sboniso Duma abanandisi oMxhashazwa, Qhoshangokwenza kwakhe, Overload Thusi, Gadla Nxumalo, Tenza noMan-B.
Imidlalo eyandulela owamanqamu izobe iphakathi kweSundowns Fan Club neKaizer Chiefs Fan Club, i-Orlando Pirates Fan Club neRoyal AM Fan Club. Lemidlalo izodlalelwa ezinkundleni ezingaphandle kweKing Zwelithini Stadium (outerfields) ngo-9 ekuseni. Ngo-12 emini kuzoba nomdlalo ozondlalela owamanqamu ozobe uphakathi kweTshatha 11 ibhekene neSantaco Legends ebese ngo-3 kube umdlalo wamanqamu. Amathikithi alomqhudelwano ayatholakala eComputicket, Ticket Pro naseSPAR ngo-R50, awe VIP abize u-R1 500.
Ongumsunguli walenhlangano, uMnuz Jason Zikalala, elandisa Ezangempela For Real, uthe inhloso yalomqhudelwano ukwakha ubumbano kubalandeli.
“Enye yezinye izinhloso ukufundisa abalandeli ngokuhlukunyezwa, ukubambana inkunzi ezinkundleni zemidlalo, ukubulala ingqalasizinda yasezinkundleni nokugqugquzela ukuthi abantu babuyele ezinkundleni beseke amaqembu abo ikakhulukazi lapha KwaZulu-Natal njengoba sinamaqembu afana naMaZulu, Golden Arrows, Richards Bay neDurban City,” kusho uZikalala.
Uthe okunye okubenze bahlela lomqhudelwano indlela yokuziphatha kwabalandeli ezinkundleni zemidlalo.
“Sibonile emdlalweni we-Al Ahly ngesikhathi ibhekene neMamelodi Sundowns abalandeli belwa. Thina siyi-12th Man Group sigqugquzela inhlalakahle ephephile ngezemidlalo. Okunye ukuziphatha kwabalandeli ezinkundleni, akusho ukuthi uma iqembu lakho lidliwa kumele ushise inkundla, kufanele uphose okuthile enkundleni, nokucwasana ebholeni kuningi kakhulu. Ngakho-ke siqala la eNingizimu Africa sifuna ukungena kuleso sikhala sithi phansi ngokucwasana ebholeni, asingayikhahlamezi ingqalasizinda yasezinkundleni, akujikijelwa ezinkundleni, kodwa akube khona indlela yokulungisa izinto,” usho kanje.
UZikalala uthe njengoba lomqhudelwano ungowokuqala ngqa futhi uzoqala lapha KwaZulu-Natal, kunezinye izifundazwe ozophindwe usingathwe kuzo okubalwa i-Eastern Cape, Mpumalanga, Gauteng neBloemfontein. Ugcizelele nokuthi umqhudelwano uzodlalwa uma isizini ivaliwe ngoba abafuni ukuphazamisa abalandeli ngesikhathi isizini iqhubeka.
