IMamelodi Sundowns ijahisa i-Orlando Pirates utalagu iphinde ilula igebe esicongweni seBetway Premiership emuva kokushaya iTS Galaxy ngo 4-1 eLucas Moripe Stadium namhlanje ebusuku.
IPirates ishaye iCape Town City ngo 2-1 e-Orlando Stadium. Ibinethemba lokuthi iTS Galaxy izokwazi ukuyibambela iSundowns njengoba yayishaya ngo 1-0 eMbombela emasontweni amabili edlule.
Nokho iSundowns ikhombise zisuka ukuthi ifuna ukuziphindiselela njengoba ivule ngegoli likaPeter Shalulile ngomuzu wokuqala.
U-Iqraam Rayners uvalele elesibili ngomzuzu wesikhombisa nokho iGalaxy yabuya ngomzuzu ka-10. Izinto zijikile uVictor Letsoalo ethola ikhadi elibomvu ngokuhlaba uBathusi Aubaas esihluzwini. Ugcine ekhishwe indawo yakhe yathathwa nguTeboho Mokoena.
U-Jayden Adams wenze iSundowns yaya ekhefini iphambili ngamagoli amathathu. Kuthe kubuywa kwesesibili uShalulile wavalela elesibili kulo mdlalo.
Umphumela wenze iSundowns yaphinde yalula igebe ngamaphuzu angu-12 esicongweni seBetway Premiership. Njengamanje inamaphuzu angu-48 emidlalweni engu-18. IPirates ilandela ngemuva ngamaphuzu angu-36 emidlalweni engu-15.
