Kujabule abalandeli be-Orlando Pirates ngokunqoba ngakolunye uhlangothi omkhaya bayo baseSoweto iKaizer Chiefs basutha induku eThekwini emidlalweni yeBetway Premiership namhlanje.
IPirates inqobe ngo 2-1 ibhekene neMamelodi Sundowns ezama ukuyijaha kwi-log yeBetway Premiership emdlalweni obuseFNB Stadium.
IPirates iwuqale kahle umdlalo uRelebohile Mofokeng eshaya amagoli amabili asheshayo ngomzuzu wesine nowesihlanu.
ISundowns ibizama ukuhlasela saze saphela isiwombe sokuqala ingafiki kunozinti uSipho Chaine ngoba alikho ibhole elikhahlelwe kuye ukuthi alivimbe.
Ngesiwombe sesibili ibuye ngamandla uKhuliso Mudau wakora ngomuzuzu ka-66.
IChiefs yona ngakolunye uhlangothi inikele eKing Zwelithini ukuyobhekana neRichards Bay FC ngenhloso yokuyofuna amaphuzu agcwele kwazise phakathi nesonto idlale ngokulingana ngo 0-0 neCape Town City FC.
Nokho ibuye ilambatha ishawa ngo 2-0 ngamagoli avalelwe wuFezile Gcaba ngomzuzu ka-48 noYanela Mbuthuma ngomzuzu ka-72.
Imiphumela yanamuhla isho ukuthi iPirates ilandela iSundowns ngamaphuzu angu-15 esicongweni weBetway Premiership. ISundowns isiqoqe angu-58 emidlalweni engu-23 kuthi iPirates ibe sendaweni yesibili ngangu-43 emidlalweni engu-19.
IChiefs yona isendaweni ka-8 ngamaphuzu angu-29 emidlalweni engu-22. IRichards Bay FC isendaweni ka-11 ngamaphuzu angu-24 emidlalweni engu-22.
