Sebengu-9 abashone kuhlasela imvula enamandla eKZN kuleli sonto.
UMnyango wakwaCogta esitatimendeni uveze ukuthi isibalo sabashonile senyuke emuva kokutholwa kwezidumbu zabesilisa ababili KwaQoloqolo eMzumbe.
Laba kuthiwa bamuka bezama ukuwela umfula. Esinye isidumbu sitholwe KwaShoba eVryheid sengane nayo emuke izama ukuwela umfula. EThekwini kushone abayisithupha ngalezi mvula.
UMEC wakwaCogta uMfu Thulasizwe Buthelezi udlulise amazwi enduduzo emindenini ekhahlamezekile. Ubonge izinhlaka ezehlukene kubalwa neminyango kahulumeni ngokubambisana ukweseka imindeni.
Umnyango uveze ukuthi sekuqaliwe ukukhuculula eThekwini.
NgoMsombuluko, uButhelezi uzohambela izindawo okukhucululwa kuzo, ahambele neminye imindeni ekhahlamezekile. Umnyango uxwayisa izakhamuzi ukuthi isikhathi sezimvula asikadluli ngakho kubalulekile ukuqaphela ukuze kugwenywe izinhlekelele.
