IKaizer Chiefs ihlulekile ukuzithoba amanxeba enduku ayithole kwi-Orlando Pirates ngoMgqibelo edlala ngokulingana ngo 2-2 naMaZulu-FC eFNB Stadium namhlanje ebusuku.
URamahlwe Mphahlele ushaye i-own goal unozinti wakhe uRichard Ofori ehluleka ukubamba ibhola. Ligcine liwela phakathi kwabo umgadli omusha weChiefs uTashreeq Morris wazitshela ukuthi uyena olithinte ekugcineni liyokhala enethini.
Akuthathanga sikhathi uTshepang Moremi wakora elokulinganisa.
Kubuywe ekhefini umgadli omusha woSuthu u-Elmo Kambundi wangqofa elokuqala kuleli qembu ngekhanda kade kuyikhona.
U-Ofori uphinde wenza iphutha walifaka enethini u-Glody Lilepo weChiefs ethi uyaligoba.
Okugqamile kulo mdlalo wukuthi amaqembu omabili abengasabani umdlalo ubuvulekile.
AmaZulu eze kulo mdlalo ehambela phezulu emuva kokushaya iSupersport United ngo 2-1 eMoses Mabhida Stadium ngoMgqibelo.
IChiefs yona ishawe ekugcineni ngo 1-0 yiPirates eFNB Stadium.
Kweminye imidlalo, iRichards Bay United ibuye ekugcineni ishaya amagoli amabili ngemizuzu emibili ihlula iMarumo Gallants ngo 2-1 eKing Zwelithini Stadium
Obuphakathi kweMagesi FC neChippa United ugcine ngokumiswa ngemuva kwemizuzu engu-15. Amalambu enkundleni entsha iSeshego Stadium, ePolokwane, abewugqam’cishi zibambene ngo 1-1.
Kuzomenyezelwa ukuthi uzoqedelwa nini.
