Inhlangano esiza umphakathi iSesimiphi NPC ichome uphaphe lwegwalagwala othisha okuphaswe kahle izifundo abazifundisayo ku-matric ngonyaka odlule ezikoleni ezingu-11 zaseLindelani, eNtuzuma naseNanda.
Le nhlangano ixhase umcimbi wokuklomelisa labothisha ngezitifiketi nangezindebe obuseJL Dube High KwaMashu ngoLwesihlanu.
Emcimbini bekukhona uDr Phumzile Langa bevela ehhovisi lomnyango wezemfundo kuzwelonke.
USihlalo weSesimiphi NPC uSibusiso Mjwara uthe uthando lwemfundo aluqali ngokuxhasa umcimbi wemiklomelo.
Uthe maphakathi nonyaka uhambela izikole anikele ngemifaniswano nezicathulo ezinganeni ezingenakho.
Uthe izikole zakulezi zindawo zenze kahle kule minyaka emithathu edlule ngakho imiklomelo igqugquzela abafundi nothisha.
Umhloli omkhulu ezikoleni zaKwaMashu, Ntuzuma, Clermont, Reservoir Hills, Westville nasePinetown, uSithembiso Lushozi uthe lezi zikole zenze kahle kakhulu ku-matric ngonyaka odlule zaphasa ngo-96.3%
“La kwisifunda sasePinetown sibe unombolo 4 ezweni lonke saba unombolo 2 esifundazweni. Kube isandla ephuma afana namasekhethi anjengeNtuzuma ngaphansi kobuholi bukababa uKhumalo,” kubeka uLushozi.
Uthe bajabula futhi babungaza othisha nothishomkhulu abasebenza ngokuzikhandla ngaphansi kwezimo ezinzima.
Uthe inkinga enkulu eyokungabi bikho kwamanzi.
