Oke waba ungqongqoshe wamabhizinisi omphakathi uDr Malusi Gigaba uvele enkantolo yeMantshi e Palm Ridge namhlanje ngecala lenkohlakalo ngokuthengwa kwezitimela kwaTransnet.
Uvele nabanye ababeyizikhulu zakwaTransnet abangaphandle ngebheyili kaR50 000 ngamacala okukhwabanisa nenkohlakalo ngethenda lezitimela elagcina linyuswe imali labiza uR3.4 billion.
Lezo zikhulu uBrain Molefe noSiyabonga Gama asebengamalungu eMK Party ephalamende, uThamsanqa Jiyane no-Anoj Singh.
Emasontweni amabili adlule uGigaba ukhiphe isitatimende lapho ethe ubizwe wuphiko lokushushisa umphakathi iNational Prosecuting Authority eyengamele i-Idac. I-Idac ephenya amacala enkohlakalo kwiNPA yathi uGigaba akaboshwanga.
Emuva kokuvela kwakhe enkantolo namuhla kuzobonakala ukuthi uzoshenxa yini emisebenzini ye-ANC ngokomgomo weqembu wokuthi abahamba amacala abasuke aze aphele.
