Nhlakanipho Mnqayi
INkantolo yesiFunda, eNtuzuma igwebe abasolwa ababili ngokubulala iphoyisa endaweni yaseMatikwe, eNanda.
UNkululeko Ntuli (29) noThembokwakhe Xulu (27) bagwetshiwe ngokubulala uWarrant Officer Maqhawe Sithole (54), owadutshulwa eNanda.
Ngokusho kwesitatimende samaphoyisa sithe ngo-24 June 2021, uWarrant Officer Sithole wayedlala isnooker nomngani wakhe esitolo. Wabe esephumela ngaphandle eyohlangana nomlingani wakhe, kwathi ngesikhathi beqeda ukuhlukana wabe esexabana nabasolwa.
“Laba basolwa babe sebemdubula bamphuca nesibhamu sakhe somsebenzi. Wabe eseyiswa esibhedlela nalapho kwafike kwamenela ngenxa yamahlandla okudutshulwa ayenawo kwase kuvulwa icala lokubulala emaphoyiseni aseNanda.”
“Zingu-29 June 2021, amaphoyisa aphenya ngobugebengu obuhleliwe abe esebopha umsolwa wokuqala uXulu. Ngesikhathi esaqhubeka nophenyo abe esebopha umsolwa wesibili uNtuli owatholwa nezibhamu ezimbili ezingekho emthethweni, esisodwa sazo sahlonzwa njengeso Mbuso, okuyiso esaphucwa iphoyisa uSithole kwathi esinye sasetshenziselwa ukubulala,” kusho isitatimende.
Sithe abasolwa bavelile enkantolo, isicelo sabo sebheyili saphikiswa.
“Bagcinwe esitokisini baze batholwa benecala zingu-25 July nonyaka. UXulu ugwetshwe iminyaka engu-13 ebhadla ejele ngecala lokubulala. UNtuli naye wagwetshwa iminyaka engu-13 ngecala lokubulala, iminyaka emihlanu ngokweba isibhamu soMbuso, eminye iminyaka engu-13 ngokutholakala nesibhamu esingekho emthethweni neminye engu-13 ngokutholakala nesibhamu sesibili esingekho emthethweni,” sisho kanje.
Ingu-16 isiyonke iminyaka uNtuli agwetshwe yona futhi yonke uzoyiqhuba kanye kanye, okuchaza ukuthi uzobhadla ejele iminyaka engu-28.
Isikhulu esiphezulu esifundazweni saKwaZulu-Natal, uMajor General Lesetja Senona ukwamukele ukugwetshwa kwalaba ababili, waphinde wancoma amaphoyisa ngomsebenzi omuhle.
