Nhlakanipho Mnqayi
ISantos FC yaku-ward 18, ibe ngompetha bomqhudelwano iDr BV Mthethwa Mayoral Tournament obubanjelwe enkundleni yesemidlalo iSiyabonga Sangweni Sports Complex kusukela ngoLwesihlanu zingu-26 yaphothulwa izolo zingu-28 September.
Bekungelona kuphela ibhola lezinyawo ebelidlalwa njengoba bekukhona nelomnqakiswano, iVolleyball, tennis, athletics kanye nama indigenous games.
ISantos iguqise iSporting FC yaku-ward-7 ngo 1-0 emdlalweni wamanqamu, yakhala yemuka nesamba sika-R130 000.
Okunye okugqamile ukuthi akuhlomulanga abezemidlalo kuphela njengoba nasemidlalweni eyahlukene bekushiyana ukwenza kuvezwa amakhono. Abadayisi nabo bathole ithuba lokuzodayisa baxoshe ikati eziko kanti namaciko endawo athole athole ithuba lokuziveza njengoba iward ngayinye ibineciko ebelinandisa.
UMphathiswa wezeMidlalo, amaCiko namaSiko, KwaZulu-Natal, uMnuz Mtomuhle Khawula, iMenenja kaMasipala waseMfolozi, uMnuz Fred Mazibuko, amakhansela kanye nomndeni wakwaMthethwa nabo bebeyingxenye yale midlalo.
UMphathiswa wezemidlalo, uMnuz Khawula, uncome uMasipala waseMfolozi ngomsebenzi omuhle wokuhlela le midlalo njengoba idlala induma enkulu ekusizeni intsha ukuthi ikwazi ukuveza amakhono ayo.
IMeya yakuMasipala waseMfolozi, uMnuz Xolani Bhengu, uthe banethemba lokuthi le midlalo izokhuphula isibalo sabadlali abaqhamuka emfolozi, abazogcine sebebonakala emaqenjini amakhulu kwazise sebekhona asebeyicabile indlela.
