Nhlakanipho Mnqayi
UNkk Fundeleni Sithole osehlale emijondolo nomndeni wakhe iminyaka eMkhumbane, eCato Crest, usezohlala ekhaya elifudumele.
UNkk Sithole (81) selokhu wahlala emijondolo nomndeni wakhe kusukela ngo-1992. Yena kanye namalunga omphakathi aku wadi-101 ngaphansi koMasipala weTheku, eCato Crest sebezothola izindlu zokufihla ikhanda njengoba kuqala ubusika.
Lezi zindlu zinamagumbi amabili okulala, igumbi lokungcebeleka, ikhishi, indawo yokugeza eneshawa nedlu yangasese.
UMphathiswa wezokuThutha nokuHlaliswa kwaBantu KwaZulu-Natal, uMnuz Sboniso Duma esebenzisana neMeya yeTheku uMnuz Cyril Xaba, uthe ugculisekile ngokwakhiwa kwazo lezi zindlu njengoba kade ezihlola ephelezelwa yiPhini likaSihlalo wezaSekhaya neNgqalasizonda, uMnuz Sfiso Mkhize neKhansela laku wadi-101, uMnuz Siphiwe Khanyile
“Ezindlini ezingu-71, zingu-46 eseziqediwe. Sinikeze inkampani eyakhayo umnqamlajuqu ukuze uqedelele izindlu ezingu-25 ezisele ekupheleni kuka-June. Sifuna ukunikeza izikhiye kuGogo Sithole nabanye ekuqaleni kwamaviki ka-July.”
“Sivumelene noMasipala weTheku ukuthi uma abahlomulule sebeyiswe ezindlini zabo ezintsha, umasipala uzoyibhidliza imijondolo. Lokhu kungenye yezindlela zokuqeda ngemijondolo,” kusho uDuma.
Uthe Uhlelo lwabo lwesikhathi eside wukwakhela abantu baseMkhumbane izindlu ezingu-1200.
