Nhlakanipho Mnqayi
UMasipala waKwaDukuza uthi imali yomkhandlu eyakhishwa ebhange i-ABSA engu-R37 million kuvela ukuthi kunenkampani nabantu abangu-15 okuyibona eyafakwa kuma-account abo.
Lokhu kuhlaluke embikweni ovezwe yibhange i-ABSA. Lo mbiko uthe lokhu okuhlalukile kuqhamuka ezinyathelweni abazithathile njengoba bebezama ukubuyisa imali eyanyamalala isigubhukane kwi-akhawuthi kamasipala.
Kuvele nokuthi embikweni abawuveza ngaphambili, imali engu-R30.8 million eyafakwa emabhange ahlukene yatholakala yase ifakwa ebhange likamasipala. Kwabikwa nokuthi umasipala wafaka izincwadi eziphuthumayo enkantolo enkulu ufuna imali eyafakwa ngokungemthetho enkampanini engaziwa engu-R4, 412, 728.83.
Esitatimendeni esikhishwe yilo masipala sithe esithangamini ababenaso ngoLwesine ngoMarch 20, umkhandlu uthole umbiko mayelana nophenyo olwenziwa yibhange u-ABSA.
“NgoLwesihlanu, zingu-31 January nonyaka, uphiko oluphenya ngokukhwabanisa lwathinta umasipala ukuqinisekisa imali eyayikhishwa ngendlela esolisayo engu-R35, 753, 141, 61. Izimpendulo zaveza ukuthi umasipala ube yisisulu sokuqolwa lapho ibhange lase-ABSA kwangenwa kulo ngokungemthetho. Ibhange lase-ABSA labe selixhumana nomasipala ukuxoxisana futhi kwenziwe nophenyo olunzulu. Ama-laptop abasebenzi abane bakamasipala okuyibona ababhekelele ukugcina nokuqinisekisa izinkokhelo ashaqiwe ukuze ayohlolwa abaphenyi bezobunhloli kwa-ABSA,” kusho isitatimende.
Kuvele nokuthi ama-laptop amathathu ashaqiwe kuwo bekukhona okokuqapha okungagunyaziwe obekungeza izinto eziningi.
“Kulezi zinto kubalwa umuntu osuke esebenzisa ilaptop ukuthi akwazi ukungena kuma-computer ngokwe-internet. Akwazi ukuqopha konke okwenzeka kwamanye ama computer. Akwazi ukuwacisha, awaqalise phansi kabusha, ayivale i computer aphinde ayivule. Akwazi nokwenza umbhalo we computer ungabonakali, okuzoveza i computer yalo oyisebenzisayo ukuthi ibe luhlaza futhi akwazi nokulalela izinkulumo ezibucayi.
“Kutholakale nokuthi ubuxhakaxhaka obafakwa obubizwa nge-Net Monitor for Employees Software tool, ayigunyaziwe ukuthi isetshenziswe uMasipala waKwaDukuza,” sisho kanje.
Siphinde saveza ukuthi umkhandlu uyalele iMenenja kamasipala ukuthi isebenzisane namaphoyisa ukubukisisa umbiko olethwe ibhange lase-ABSA futhi imenenja izophinde iyobikela uMnyango wezoBusa ngokuBambisana nezoMdabu KwaZulu-Natal ngenqubekela phambili yalolu daba.
Okhulumela uMasipala waKwaDukuza uMnuz Sifiso Zulu, uthe uyakuqinisekisa ukuthi umbiko wophenyo lakwa-ABSA uhlonze izinkampani nabantu abangu-15 okuyibona imali eyafakwa emabhange abo.
“Akulula ukuba sithi siyabazi ngoba kusenemininingwane okusafanele amabhange abo asinikeze yona, noma ayinike amaphoyisa ukuze kwaziwe yonke into mayelana nalowo muntu noma leyo nkampani. Okwamanje kusengamagama ezinkampani nabantu, akunakheli nanombolo kamazisi. Ngaleyo ndlela asikakabazi ngokugcwele labo bantu nalezo nkampani,” kusho uZulu.
