Nhlakanipho Mnqayi
Umnyango wezokuBusa ngokuBambisana nezoMdabu, KwaZulu-Natal usuveze ukuthi uzophenya omasipala abathathu kulesi sifundazwe.
Kulabo masipala kubalwa owaseMsunduzi, owaKwaDukuza nowaKwaNongoma.
UMphathiswa ohola lomnyango uMfundisi Thulasiwe Buthelezi, ugunyaze umthetho uSection-106 kubo labo masipala ukuthi baseshwe.
Esitatimendeni asikhiphile, uMfu Buthelezi uthe lesi senzo siphoqwa nguSection-106 we-Municipal Systems Act omnikeza igunya lokuthi aqale uphenyo njengoba athola izikhalazo mayelana nenkonhlakalo nokukhwabanisa komasipala.
“Lolu phenyo luzobhekana ngqo nezinsolo ezithinta ukusetshenziswa budedengu kwengqalasizinda yomasipala. Ukungenelela kwezepolitiki uma kukhishwa imisebenzi ethize, ukungaqashwa ngendlela okuyiyo, ukuphathwa budedengu komasipala, ukukhwabanisa nenkohlakalo,” kusho uMfu Buthelezi.
Uthe njengoba beqinisekisa ukuthi yonke into ihamba ngendlela komasipala, balindele ukuthi basebenzisane nabaphenyi abaqokiwe.
