Nhlakanipho Mnqayi
ABASHAYI bedadamu bazothi ukuma kancane ukubhukuda eKings Park, eThekwini njengoba lendawo ilungiswa.
UMasipala waseThekwini uveze ukuthi usubeke imali engango-R42 million ukulungisa lendawo njengoba kuyingxenye yeDolobha yokuthuthukisa zonke izindawo zikaMasipala zokubhukuda.
Indawo yokubhukuda yaseKings Park inendawo yangaphakathi neyangaphandle. Eyangaphakathi inendawo yokubhukuda engamamitha angu-50, kuthi engaphandle ibe namamitha angu-25 ubude no-6.5 wamamitha ukushona phansi wokubhukuda.
Lendawo yokubhukuda iyona kuphela eNingizimu Afrika enesitifiketi se-International Swimming Federation (FINA), okuyisigungu esigunyazwe yi-International Olympic Committee esikwazi ukusingatha imincintiswano yomhlaba yasemanzini.
Ngokusho kwesitatimende esikhishwe yilomasipala sithe ukulungiswa kwalendawo kulandela ukukhahlamezeka kwayo ngesikhathi kunomoya onamandla nyakenye.
“Ukuthuthukiswa okubalulekile kubalwa ukufaka kwamalambu e-1500 LUX, ukushintshwa kufakwe amawindi egilasi, ukufakwa kwama-coatings ezitebhisi, ukuthuthukisa izindawo zokuhamba nezokubambhelela, ukulungiswa kwezindawo zokudla, ukuplastera nokupenda, ukufakwa kwabusha kwegama, ibhodi lokubhala imiphumela namabhodi okutshuza,” kusho isitatimende.
Sithe ababhukudi bazozithokozela kakhulu lezi zinguquko.
“Maduzane nje indawo yokubhukuda elungiswe kabusha yaseKings Park, ababhukudi bazoyithakasela kakhulu njengoba yavalwa ngoNovemba nyakenye ukuze ikwazi ukulungiswa. Uma isimo sezulu sisivumela, ukulungiswa kulindeleke ukuthi kuqedwe uma kuphela u-Ephreli nonyaka,” sisho kanje
